VAINGANGA NEWS 24/ विशेष प्रतिनिधी,
ब्रह्मपुरीत भव्य शोभायात्रा; सुवर्णपदक विजेत्यांसह गुणवंत विद्यार्थ्यांचा सन्मान, समाजाच्या प्रगतीचा सामूहिक संकल्प
ब्रह्मपुरी, 27 ऑक्टोबर 2026::-
रामायण महाकाव्याचे रचनाकार, आद्यकवी भगवान महर्षी वाल्मिकी यांच्या जयंतीनिमित्त ब्रह्मपुरी येथे भक्तिभाव, उत्साह आणि सामाजिक प्रबोधनाचा संगम अनुभवायला मिळाला. महर्षी वाल्मिकी जयंती उत्सव समिती, ब्रह्मपुरीच्या वतीने सोमवार, २६ ऑक्टोबर रोजी जुना मच्छी मार्केट, कोट तलाव बाजार चौक येथे जयंती उत्सवाचे आयोजन करण्यात आले. यानिमित्त महर्षी वाल्मिकी यांच्या प्रतिमेचे पूजन, दीपप्रज्वलन, मान्यवरांचा सहभाग, गुणवंत विद्यार्थ्यांचा गौरव आणि शहरातून काढण्यात आलेल्या भव्य शोभायात्रेने संपूर्ण परिसर उत्साहमय झाला.
या उत्सवातून धार्मिक श्रद्धेसोबतच शिक्षण, सामाजिक एकजूट, स्वाभिमान आणि परिवर्तनाचा संदेश देण्यात आला.
शिक्षण, संघटन आणि प्रबोधनातूनच समाजाची प्रगती! :-
कार्यक्रमाचे प्रमुख वक्ते प्रा. अरुण मेश्राम (अमरावती) यांनी आपल्या प्रबोधनपर भाषणातून समाजाच्या सर्वांगीण विकासासाठी शिक्षण, संघटन आणि सामाजिक परिवर्तनाचे महत्त्व अधोरेखित केले. समाजाची खरी प्रगती केवळ जयंती आणि उत्सव साजरे करण्यात नसून, त्या माध्यमातून निर्माण होणारी जागरूकता प्रत्यक्ष कृतीत उतरविण्यात आहे, असा संदेश त्यांनी दिला.
ढिवर-भोई समाजाने महर्षी वाल्मिकी यांच्या विचारांतून प्रेरणा घेऊन आत्मचिंतन करावे, अन्यायाविरुद्ध संघटितपणे उभे राहावे आणि शैक्षणिक, सामाजिक व आर्थिक प्रगतीसाठी ठोस पावले उचलावीत, असे आवाहन त्यांनी केले.
अध्यक्षीय भाषणातून एकजुटीचे आवाहन :-
कार्यक्रमाच्या अध्यक्षस्थानी सेवानिवृत्त न्यायाधीश चंद्रलाल मेश्राम होते. त्यांनी समाजाच्या सर्वांगीण विकासासाठी शिक्षणाला सर्वोच्च प्राधान्य देण्याची गरज व्यक्त केली. महर्षी वाल्मिकी यांच्या विचारांचा केवळ जयघोष न करता ते आचरणात आणणे आवश्यक आहे. विद्यार्थ्यांना उच्च शिक्षणासाठी प्रोत्साहन, युवकांना स्पर्धात्मक युगासाठी सक्षम करणे, महिलांचा सन्मान व सहभाग वाढविणे आणि सामाजिक प्रश्नांवर एकजुटीने मार्ग काढणे ही काळाची गरज असल्याचे त्यांनी सांगितले.
समाजातील अनावश्यक मतभेद, गटबाजी आणि परस्परांतील दुरावा बाजूला ठेवून पुढील पिढीच्या उज्ज्वल भविष्यासाठी सर्वांनी एकत्र यावे, असे आवाहनही त्यांनी केले. प्रत्येक मुलाला शिक्षणाची संधी, प्रत्येक तरुणाला स्वाभिमानाने जगण्याची प्रेरणा आणि प्रत्येक कुटुंबाला प्रगतीची उमेद मिळाली पाहिजे, हा या उत्सवाचा महत्त्वपूर्ण संदेश ठरला.
सुवर्णपदक विजेत्यांसह गुणवंतांचा गौरव :-
समाजातील विद्यार्थ्यांना शिक्षणासाठी प्रेरणा मिळावी आणि त्यांच्या यशातून इतरांनीही प्रेरणा घ्यावी, या उद्देशाने गुणवंत विद्यार्थ्यांचा मान्यवरांच्या हस्ते सत्कार करण्यात आला.
गोंडवाना विद्यापीठातून भूगोल विषयात पदवी स्तरावर सुवर्णपदक मिळविणाऱ्या निलज येथील करण दिघोरे यांचा विशेष गौरव करण्यात आला. तसेच पोर्टलमार्फत पहिल्याच यादीत जिल्हा परिषद शिक्षकपदी नियुक्ती मिळविणाऱ्या अहेर नवरगाव येथील मंगेश जराते यांचाही सत्कार करण्यात आला.
याशिवाय दहावी आणि बारावीच्या परीक्षेत उत्कृष्ट गुणवत्ता संपादन करणाऱ्या विद्यार्थ्यांचा गौरव करण्यात आला. राज्यस्तरीय कुस्तीगीर स्पर्धेत सहभागी झालेली कशिष शेडमाके हिचाही यावेळी सन्मान करण्यात आला.
विद्यार्थ्यांच्या यशाचा गौरव म्हणजे समाजाच्या उज्ज्वल भविष्याचा सन्मान, अशी भावना या सत्कार सोहळ्यातून व्यक्त झाली. गुणवंतांच्या कर्तृत्वाचा गौरव करून शिक्षणाची प्रेरणा घराघरांत पोहोचविण्याचा प्रयत्न उत्सव समितीने केला.
आमदार कीर्तीकुमार भांगडिया यांच्या हस्ते उद्घाटन :-
या कार्यक्रमाचे उद्घाटन चिमूर विधानसभा क्षेत्राचे आमदार कीर्तीकुमार भांगडिया यांच्या हस्ते झाले. यावेळी सत्कारमूर्ती ब्रह्मपुरी नगरपालिकेचे अध्यक्ष योगेशभाऊ मिसार, नगरसेवक मनोजभाऊ कावळे, प्रमुख वक्ते प्रा. अरुण मेश्राम (अमरावती), राहुल पडाल (यवतमाळ), प्रा. भाग्यवान मेश्राम (आरमोरी), जिल्हा मध्यवर्ती सहकारी बँकेचे माजी उपाध्यक्ष यशवंतराव दिघोरे, प्रेमलाल मेश्राम, प्रभुजी वाघधरे, तुकडोजी चाचरकर, विजय दिघोरे, नथ्थुजी चांदेकर, रविंद्र अलगदेवे, आनंद शिवरकर, गोपाळराव भानारकर, अनिल पचारे, प्रमोद दिघोरे, हरीश कामडी, अमोल भानारकर, स्वप्निल अलगदेवे आणि संदिप भानारकर यांच्यासह समाजातील अनेक मान्यवर उपस्थित होते.
कार्यक्रमाचे प्रास्ताविक ग्रीष्मा दिघोरे यांनी केले, तर कवी संतोष मेश्राम यांनी सूत्रसंचालन केले.
भव्य शोभायात्रेतून समाजाच्या एकजुटीचे दर्शन :-
मार्गदर्शन व प्रबोधनपर कार्यक्रमानंतर ब्रह्मपुरी शहरातील प्रमुख मार्गांवरून भगवान महर्षी वाल्मिकी यांची भव्य शोभायात्रा उत्साहात काढण्यात आली. या शोभायात्रेत समाजातील हजारो समाजबांधव सहभागी झाले होते. उत्साहपूर्ण वातावरणात निघालेल्या या शोभायात्रेतून महर्षी वाल्मिकी यांच्याप्रती श्रद्धा, समाजाची सांस्कृतिक ओळख आणि एकजुटीचा संदेश अधोरेखित झाला.
कार्यक्रमाच्या शेवटी उपस्थित समाजबांधवांसाठी भोजनाची व्यवस्था करण्यात आली. संपूर्ण कार्यक्रमाच्या यशस्वी आयोजनासाठी महर्षी वाल्मिकी महिला बचतगटाने सहकार्य केले.
उत्सवातून परिवर्तनाचा संकल्प :-
महर्षी वाल्मिकी जयंतीचा हा उत्सव केवळ धार्मिक आणि सांस्कृतिक सोहळा न ठरता शिक्षण, स्वाभिमान, सामाजिक एकजूट आणि परिवर्तनाची दिशा दाखविणारा उपक्रम ठरला. गुणवंतांचा सन्मान, विचारांचे प्रबोधन आणि भव्य शोभायात्रेच्या माध्यमातून समाजाने एकत्र येऊन प्रगतीच्या दिशेने वाटचाल करण्याचा संदेश दिला. महर्षी वाल्मिकी यांच्या विचारांचा आदर्श घेऊन शिक्षित, संघटित आणि प्रगत समाज घडविण्याचा निर्धार या उत्सवातून व्यक्त झाला.
