VAINGANGA NEWS 24/ विशेष प्रतिनिधी,
गडचिरोलीच्या नगराध्यक्षा अॅड. प्रणोती निंबोरकर व नगरसेवक सागर निंबोरकर यांचा सामाजिक बांधिलकीतून स्तुत्य उपक्रम; मुख्यमंत्री देवेंद्र फडणवीस यांच्याकडे धनादेश सुपूर्द,
गडचिरोली, 15 नोव्हेंबर 2026 :-दुष्काळाच्या संकटाने आर्थिक अडचणीत सापडलेल्या शेतकरी बांधवांच्या मदतीसाठी गडचिरोलीच्या नगराध्यक्षा अॅड. प्रणोती निंबोरकर आणि नगरसेवक सागर निंबोरकर यांनी सामाजिक बांधिलकी जपत पुढाकार घेतला आहे. शेतकऱ्यांना संकटाच्या काळात आर्थिक आधार मिळावा, या उद्देशाने त्यांनी मुख्यमंत्री सहाय्यता निधीसाठी तब्बल २ लाख ५१ हजार रुपयांची मदत दिली आहे. या मदतीचा धनादेश मुख्यमंत्री देवेंद्र फडणवीस यांच्याकडे सुपूर्द करण्यात आला.
राज्यातील विविध भागांमध्ये दुष्काळी परिस्थितीमुळे शेतकरी बांधवांना मोठ्या आर्थिक संकटाचा सामना करावा लागत आहे. निसर्गाच्या लहरीपणामुळे शेतीचे नुकसान, उत्पादनातील घट आणि वाढता आर्थिक भार यामुळे शेतकरी कुटुंबांसमोर अनेक प्रश्न निर्माण झाले आहेत. अशा कठीण परिस्थितीत बळीराजाच्या पाठीशी उभे राहणे ही केवळ शासनाचीच नव्हे, तर समाजातील प्रत्येक घटकाची जबाबदारी असल्याची भावना निंबोरकर दाम्पत्याने या कृतीतून व्यक्त केली आहे.
शेतकरी हा देशाच्या अर्थव्यवस्थेचा कणा असून त्याच्या कष्टावर संपूर्ण समाजाची अन्नव्यवस्था अवलंबून आहे. त्यामुळे शेतकरी संकटात असताना केवळ सहानुभूती व्यक्त करण्यापेक्षा प्रत्यक्ष मदतीसाठी पुढे येणे अधिक महत्त्वाचे आहे. याच विचारातून मुख्यमंत्री सहाय्यता निधीला २ लाख ५१ हजार रुपयांचे योगदान देत निंबोरकर दाम्पत्याने सामाजिक उत्तरदायित्वाचा आदर्श निर्माण केला आहे.
त्यांच्या या स्तुत्य उपक्रमातून दुष्काळग्रस्त शेतकऱ्यांप्रती संवेदनशीलता, सामाजिक जाणीव आणि बळीराजाविषयीची कृतज्ञता अधोरेखित झाली आहे. संकटाच्या काळात शेतकऱ्यांच्या पाठीशी समाजानेही खंबीरपणे उभे राहावे, असा सकारात्मक संदेश या मदतीच्या माध्यमातून देण्यात आला आहे.
