VAINGANGA NEWS 24/ विशेष प्रतिनिधी,
गडचिरोली पोलीस दलाचा दुर्गम भागातील नागरिकांसाठी पुढाकार; मोफत औषधोपचारासह आरोग्यविषयक मार्गदर्शन,
गडचिरोली, 10 ऑक्टोबर 2026::- जिल्ह्यातील अतिदुर्गम भागातील नागरिकांना आरोग्य सुविधा उपलब्ध करून देण्याच्या उद्देशाने गडचिरोली पोलीस दलाच्या वतीने मौजा कटेझरी येथे शुक्रवारी (९ ऑक्टोबर) मोफत आरोग्य तपासणी शिबिराचे आयोजन करण्यात आले. या शिबिरात एकूण १२२ नागरिकांची तज्ज्ञ वैद्यकीय पथकाकडून आरोग्य तपासणी करण्यात आली. आवश्यकतेनुसार नागरिकांना मोफत औषधांचे वितरण करण्यात आले, तर तीन नागरिकांना पुढील उपचारांसाठी रुग्णालयात जाण्याची शिफारस करण्यात आली.
पोलीस रुग्णालय गडचिरोली, जिल्हा सामान्य रुग्णालय गडचिरोली आणि जिल्हा परिषद गडचिरोली यांच्या संयुक्त विद्यमाने हा उपक्रम राबविण्यात आला. पोलीस अधीक्षक एम. रमेश यांच्या मार्गदर्शनाखाली आयोजित या शिबिरातून दुर्गम भागातील नागरिकांमध्ये आरोग्यविषयक जागरूकता निर्माण करण्यासह त्यांना आवश्यक वैद्यकीय सेवा उपलब्ध करून देण्यावर भर देण्यात आला.
तज्ज्ञ वैद्यकीय पथकाकडून तपासणी :-
शिबिरादरम्यान पोलीस रुग्णालय गडचिरोलीचे वैद्यकीय अधिकारी डॉ. गणेश चिचघरे यांच्या नेतृत्वाखाली औषधनिर्माण अधिकारी प्रकाश दानव आणि अधिपरिचारिका श्रीमती शिल्पा चांदेकर यांनी नागरिकांची आरोग्य तपासणी केली. विविध आजारांची लक्षणे, आरोग्याची काळजी, पोषणविषयक समस्या आणि आवश्यक उपचार याबाबत नागरिकांना मार्गदर्शन करण्यात आले. तपासणीनंतर गरजेनुसार मोफत औषधांचे वितरणही करण्यात आले.
आरोग्यसेवेसोबत सामाजिक बांधिलकी :-
गडचिरोली पोलीस दलाकडून सन २०२१ पासून आरोग्यविषयक विविध उपक्रम सातत्याने राबविण्यात येत आहेत. आजपर्यंत आयोजित करण्यात आलेल्या २२३ आरोग्य मेळाव्यांच्या माध्यमातून ५० हजारांहून अधिक नागरिकांची आरोग्य तपासणी करण्यात आली आहे. तसेच सहा रक्तदान शिबिरांमधून ४ हजार ८६४ युनिट रक्ताचे संकलन करण्यात आले आहे.
याशिवाय, ‘ऑपरेशन रोशनी’च्या माध्यमातून ९ हजार ९७१ हून अधिक नागरिकांची नेत्रतपासणी करण्यात आली असून, १ हजार ५४२ नागरिकांवर मोफत मोतीबिंदू शस्त्रक्रिया करण्यात आल्या आहेत. या उपक्रमांमुळे दुर्गम भागातील नागरिकांना आरोग्य सुविधा मिळवून देण्यास मदत झाली आहे.
शहीद जवानांच्या बलिदानाबाबत जनजागृती :-
आरोग्य शिबिरासोबतच गडचिरोली जिल्ह्यात कर्तव्य बजावताना शहीद झालेल्या जवानांचे बलिदान, सी-६० जवानांचे शौर्य आणि पोलीस दलाच्या नागरी कृती उपक्रमांची माहिती नागरिकांना देण्यात आली. फिरत्या प्रदर्शनातील विविध बॅनरच्या माध्यमातून पोलीस दलाच्या कार्याची माहिती देत नागरिकांमध्ये जनजागृती करण्यात आली.
वरिष्ठ अधिकाऱ्यांच्या मार्गदर्शनाखाली आयोजन :-
या आरोग्य शिबिराचे आयोजन पोलीस अधीक्षक एम. रमेश, जिल्हा परिषदेचे मुख्य कार्यकारी अधिकारी सुहास गाडे, अपर पोलीस अधीक्षक (अभियान) कार्तिक मधीरा, अपर पोलीस अधीक्षक (प्रशासन) गोकुल राज जी. आणि सहायक पोलीस अधीक्षक, धानोरा सुयश कुमार सिंग यांच्या मार्गदर्शनाखाली करण्यात आले.
कटेझरी पोलीस स्टेशनचे पोलीस उपनिरीक्षक चेतन गवळी आणि पोलीस अंमलदारांनी शिबिराच्या यशस्वी आयोजनासाठी परिश्रम घेतले. दुर्गम भागातील नागरिकांपर्यंत आरोग्यसेवा पोहोचविण्याबरोबरच सामाजिक बांधिलकी जपण्याचा गडचिरोली पोलीस दलाचा हा उपक्रम महत्त्वपूर्ण ठरला.
