VAINGANGA NEWS 24/ विशेष प्रतिनिधी,
नाट्यप्रयोगांवरील निर्बंधांमुळे शेकडो नाट्यसंस्था आणि हजारो व्यावसायिक अडचणीत; काँग्रेस नेते महेंद्र ब्राह्मणवाडे यांची प्रशासनाकडे मागणी,
गडचिरोली, 10 ऑक्टोबर 2026::-पूर्व विदर्भाची सांस्कृतिक ओळख असलेल्या झाडीपट्टी रंगभूमीसमोर यंदा नाट्यप्रयोगांच्या परवानग्यांचा प्रश्न निर्माण झाला आहे. प्रशासनाकडून विविध कारणांमुळे नाट्यप्रयोगांना परवानगी मिळण्यात अडचणी येत असल्याने कलाकार, नाट्यसंस्था आणि या व्यवसायावर अवलंबून असलेल्या हजारो लोकांच्या रोजगाराचा प्रश्न ऐरणीवर आला आहे. झाडीपट्टी रंगभूमीची परंपरा जपण्यासाठी आणि संबंधितांच्या उपजीविकेचा विचार करून प्रशासनाने नाट्यप्रयोगांना रीतसर परवानगी द्यावी, अशी मागणी काँग्रेस नेते महेंद्र ब्राह्मणवाडे यांनी केली आहे.
गडचिरोली, चंद्रपूरसह पूर्व विदर्भातील सहा जिल्ह्यांमध्ये झाडीपट्टी रंगभूमीला मोठी परंपरा लाभली आहे. ग्रामीण भागातील रसिकांच्या मनोरंजनासोबतच सामाजिक प्रबोधनाचे प्रभावी माध्यम म्हणून या रंगभूमीने आपली स्वतंत्र ओळख निर्माण केली आहे. सामाजिक, शैक्षणिक, कौटुंबिक आणि वास्तववादी विषयांवर आधारित नाट्यप्रयोगांमधून स्थानिक कलाकारांना आपली कला सादर करण्याची संधी मिळते. त्यामुळे झाडीपट्टी रंगभूमी ही केवळ मनोरंजनाची परंपरा नसून पूर्व विदर्भाच्या सांस्कृतिक जीवनाचा अविभाज्य भाग आहे.
नाट्यव्यवसायातून हजारो जणांना रोजगार :-
झाडीपट्टी नाट्यव्यवसायाच्या माध्यमातून दरवर्षी शंभर कोटी रुपयांहून अधिक आर्थिक उलाढाल होत असल्याचे सांगितले जाते. या व्यवसायात अभिनेते, लेखक, दिग्दर्शक, संगीतकार, वादक यांच्यासह मंडप व सजावट व्यावसायिक, ध्वनियंत्रणा चालक, वाहनचालक आणि इतर अनेक घटकांचा सहभाग असतो. नाट्यप्रयोगांच्या आयोजनामुळे स्थानिक बाजारपेठेलाही चालना मिळते. परिणामी, अनेक कुटुंबांचा उदरनिर्वाह या व्यवसायावर अवलंबून आहे.
परवानग्यांअभावी कलाकारांसमोर आर्थिक संकट :-
अनेक कलाकार आणि तंत्रज्ञ वर्षभर नाट्यप्रयोगांतून मिळणाऱ्या उत्पन्नावर अवलंबून असतात. विशेषतः ग्रामीण भागातील कलाकारांसाठी झाडीपट्टी रंगभूमी हे रोजगाराचे महत्त्वपूर्ण साधन आहे. अशा परिस्थितीत नाट्यप्रयोगांच्या परवानग्या मिळण्यात अडथळे निर्माण झाल्यास त्याचा थेट परिणाम कलाकारांच्या उत्पन्नावर होतो. त्याचबरोबर नाट्यसंस्था, मंडप व्यावसायिक, वादक, तंत्रज्ञ आणि अन्य पूरक व्यावसायिकांनाही आर्थिक फटका बसण्याची शक्यता आहे.
सांस्कृतिक वारसा जपण्याची प्रशासनाची जबाबदारी :-
झाडीपट्टी रंगभूमीने अनेक कलाकारांना हक्काचे व्यासपीठ उपलब्ध करून दिले असून या माध्यमातून ग्रामीण भागातील कला आणि संस्कृती जिवंत राहिली आहे. त्यामुळे नाट्यप्रयोगांच्या परवानगीसंदर्भातील अडचणी दूर करून आवश्यक नियम व सुरक्षा निकषांचे पालन करण्याच्या अटींवर प्रशासनाने परवानगी प्रक्रिया सुलभ करावी. सांस्कृतिक परंपरेचे जतन करतानाच या क्षेत्रातील कलाकार आणि व्यावसायिकांच्या रोजगाराचा प्रश्नही गांभीर्याने घ्यावा, असे आवाहन महेंद्र ब्राह्मणवाडे यांनी केले आहे.
