Tuesday, November 17, 2026
HomeGhotनागपूर-घोट मार्गावर धावत्या ट्रॅव्हल्सला आगीचा भीषण विळखा; प्रवाशांची जीव वाचविण्यासाठी धावपळ :-

नागपूर-घोट मार्गावर धावत्या ट्रॅव्हल्सला आगीचा भीषण विळखा; प्रवाशांची जीव वाचविण्यासाठी धावपळ :-

VAINGANGA NEWS 24/ विशेष प्रतिनिधी,

कुही फाट्याजवळ अजंनी ट्रॅव्हल्सने घेतला अचानक पेट; प्रवाशांनी प्रसंगावधान राखत बसमधून घेतली धाव, सामान जळून खाक; सुदैवाने जीवितहानी टळली,

चामोर्शी / घोट, 16 नोव्हेंबर 2026 :- नागपूरहून घोटकडे जाणाऱ्या अजंनी ट्रॅव्हल्सला कुही फाट्याजवळ अचानक भीषण आग लागल्याची घटना काल सायंकाळी सुमारे ५.३० वाजताच्या सुमारास घडली. भरधाव धावणाऱ्या ट्रॅव्हल्सने अचानक पेट घेतल्याने बसमधील प्रवाशांमध्ये एकच घबराट पसरली. काही क्षणांतच प्रवासाचा आनंद भीतीच्या थरारात बदलला.

ट्रॅव्हल्सला आग लागल्याचे लक्षात येताच प्रवाशांनी जीव वाचविण्यासाठी बसमधून बाहेर पडण्याची धडपड सुरू केली. अचानक उद्भवलेल्या या प्रसंगामुळे काही काळ घटनास्थळी गोंधळाचे वातावरण निर्माण झाले. मात्र, प्रवाशांनी प्रसंगावधान राखत तातडीने बसमधून बाहेर पडल्याने मोठा अनर्थ टळला. सुदैवाने या दुर्घटनेत कोणतीही जीवितहानी झाल्याचे वृत्त नाही.

दरम्यान, आगीने काही वेळातच रौद्र रूप धारण केले. या दुर्घटनेत अनेक प्रवाशांचे वैयक्तिक सामान जळून खाक झाल्याची प्राथमिक माहिती समोर आली आहे. आगीमुळे प्रवाशांचे मोठे आर्थिक नुकसान झाले असून, या घटनेचा प्रवाशांना मोठा मानसिक धक्का बसला आहे. ट्रॅव्हल्सला आग नेमकी कोणत्या कारणामुळे लागली, हे अद्याप स्पष्ट झालेले नाही.

खासगी ट्रॅव्हल्सच्या सुरक्षिततेवर पुन्हा प्रश्नचिन्ह :-

नागपूर-घोट मार्गावर नियमित धावणाऱ्या खासगी ट्रॅव्हल्सला अशा प्रकारे अचानक आग लागल्याच्या घटनेने प्रवासी वाहतुकीच्या सुरक्षिततेचा प्रश्न पुन्हा ऐरणीवर आला आहे. प्रवाशांच्या सुरक्षिततेसाठी बसमध्ये अग्निशमन यंत्रणा, आपत्कालीन बाहेर पडण्याचे दरवाजे आणि आवश्यक सुरक्षा उपकरणे उपलब्ध आहेत का, याची तपासणी होणे गरजेचे आहे.

खासगी प्रवासी वाहतूक करणाऱ्या वाहनांची नियमित तांत्रिक तपासणी तसेच अग्निसुरक्षेच्या नियमांची काटेकोर अंमलबजावणी करण्याची आवश्यकता या घटनेतून अधोरेखित झाली आहे. प्रवाशांच्या जीवाशी संबंधित सुरक्षेच्या बाबतीत कोणतीही तडजोड होता कामा नये. त्यामुळे संबंधित परिवहन विभागाने या घटनेची गांभीर्याने दखल घेऊन खासगी ट्रॅव्हल्सच्या सुरक्षिततेची तपासणी करावी, अशी मागणी प्रवाशांकडून होण्याची शक्यता आहे.

RELATED ARTICLES

Visitor Counter

- Advertisment -spot_imgspot_img

Most Popular