VAINGANGA NEWS 24/ विशेष प्रतिनिधी,
मलेरिया रुग्णांच्या वाढत्या संख्येवर चिंता _आरोग्य सुविधांचा घेतला आढावा; प्रशासनासोबत तातडीने उपाययोजना करण्याचे आश्वासन,
गडचिरोली/धानोरा, २७ जून २०२५::- आज शुक्रवार, २७ जून रोजी दुपारच्या २ वाजताच्या सुमारास, स्थानिक आमदार डॉ. मिलिंद नरोटे यांनी धानोरा तालुक्यातील अतिदुर्गम भागातील प्राथमिक आरोग्य केंद्र गोडलवाही (P.H.C. Godalwahi) येथे प्रत्यक्ष भेट देऊन केंद्राची सविस्तर पाहणी केली. या भेटीदरम्यान त्यांनी येथील आरोग्य सुविधांचा आढावा घेतला आणि स्थानिक नागरिकांना भेडसावणाऱ्या आरोग्यविषयक समस्या, विशेषतः या दुर्गम परिसरातील आव्हाने, जाणून घेतल्या.
या पाहणी दौऱ्यात एक गंभीर बाब त्यांच्या निदर्शनास आली. गोडलवाही परिसरात मलेरियाच्या रुग्णांची संख्या लक्षणीय असल्याचे दिसून आले. या स्थितीबद्दल त्यांनी तीव्र चिंता व्यक्त केली आणि यावर तातडीने उपाययोजना करण्याची गरज असल्याचे नमूद केले.भेटीनंतर बोलताना डॉ. नरोटे यांनी सांगितले की, या पाहणी दौऱ्यात समोर आलेल्या समस्यांवर, विशेषतः अतिदुर्गम भागातील मलेरिया नियंत्रणासाठी, तातडीने लक्ष दिले जाईल.
याबाबत प्रशासनासोबत चर्चा करून आवश्यक उपाययोजना करण्यासंदर्भात कार्यवाही केली जाईल, असे आश्वासन त्यांनी दिले. नागरिकांना उत्तम आरोग्य सुविधा मिळाव्यात आणि त्यांना मलेरियासारख्या आजारांपासून संरक्षण मिळावे यासाठी आपण कटिबद्ध असल्याचेही त्यांनी अधोरेखित केले.याप्रसंगी भाजप ओबीसी मोर्चाचे जिल्हाध्यक्ष श्री. अनिलजी पोहनकर, भाजप धानोरा तालुकाध्यक्ष श्री. साजनजी गुंडावार, श्री. सारंगजी साळवे, श्री. सुभाषजी धाईत, श्री. सुभाषजी खोबरे, श्री. राकेशजी दास, श्री. गजाननजी परचाके आणि प्रा.आ. केंद्रच्या डॉ. पूजा परशुरामकर यांच्यासह स्थानिक कार्यकर्ते व नागरिक उपस्थित होते.
