वैगन्ग्स NEWS 24/ विशेष प्रतिनिधी,
एपिड्युरल भूलतंत्राचा प्रभावी वापर; जनरल अनेस्थेसियाशिवाय डॉक्टरांनी यशस्वी केली शस्त्रक्रिया,
गडचिरोली, 30 ऑक्टोबर 2026::-जिल्ह्यातील अतिदुर्गम आणि आदिवासीबहुल हेडरी परिसरातही आधुनिक वैद्यकीय सुविधा उपलब्ध होत असल्याचे सकारात्मक चित्र समोर आले आहे. हेडरी येथील लॉयड्स काली अम्मल मेमोरियल हॉस्पिटल (LKAMH) येथे डॉक्टरांच्या तत्परतेने आणि तज्ज्ञ वैद्यकीय पथकाच्या समन्वयातून एका गर्भवती महिलेची आपत्कालीन सिझेरियन शस्त्रक्रिया यशस्वीरीत्या पार पडली. या प्रसूतीत माता व नवजात बालक दोघांचीही प्रकृती सुखरूप असून, महिलेने २.२७७ किलो वजनाच्या निरोगी बाळाला जन्म दिला.
गुंतागुंत लक्षात येताच डॉक्टरांचा तातडीने निर्णय :-
प्राप्त माहितीनुसार, संबंधित गर्भवती महिलेला सुरुवातीला सामान्य प्रसूतीसाठी सहकार्य मिळावे आणि प्रसूतीच्या वेदना कमी व्हाव्यात, या उद्देशाने एपिड्यूरल अॅनाल्जेसिया देण्यात आले होते. मात्र, तपासणीदरम्यान गर्भजलाचे प्रमाण कमी असणे (ओलिगोहायड्राम्निओसिस), गर्भातील बाळाची अपेक्षित वाढ न होणे (FGR) तसेच बाळाच्या मानेभोवती नाळ असणे अशा गुंतागुंती आढळून आल्या.
याचदरम्यान गर्भातील बाळाला त्रास होत असल्याचे (फिटल डिस्ट्रेस) संकेत मिळाल्याने डॉक्टरांनी परिस्थितीचे गांभीर्य ओळखून क्षणाचाही विलंब न करता आपत्कालीन लोअर सेगमेंट सिझेरियन सेक्शन (LSCS) करण्याचा निर्णय घेतला. डॉक्टरांच्या समयसूचकतेमुळे आणि योग्य उपचारपद्धतीमुळे संभाव्य धोका टाळण्यात यश आले.
जनरल अनेस्थेसियाशिवाय शस्त्रक्रिया; आधुनिक उपचारपद्धतीचा प्रभावी वापर :-
या संपूर्ण प्रक्रियेत वैद्यकीय पथकाचे कौशल्य आणि समन्वय विशेष महत्त्वाचा ठरला. यापूर्वी देण्यात आलेले एपिड्यूरल अनेस्थेसिया सिझेरियन शस्त्रक्रियेसाठी पुरेसे ठरल्याने जनरल अनेस्थेसिया देण्याची आवश्यकता भासली नाही. त्यामुळे शस्त्रक्रियेदरम्यान महिलेला वेदनारहित आणि आरामदायी अनुभव मिळाला. आधुनिक भूलतंत्रज्ञानाचा योग्य वापर करून दुर्गम भागातही सुरक्षित प्रसूतीसेवा देता येत असल्याचे या घटनेतून स्पष्ट झाले आहे.
दुर्गम भागातील नागरिकांसाठी दर्जेदार आरोग्यसेवेचा विश्वास :-
लॉयड्स काली अम्मल मेमोरियल हॉस्पिटलच्या माध्यमातून दुर्गम आणि आदिवासीबहुल भागातील नागरिकांना आधुनिक वैद्यकीय सुविधा उपलब्ध करून देण्याचे काम सातत्याने सुरू आहे. अत्याधुनिक तंत्रज्ञानासोबतच रुग्णांच्या सुरक्षिततेला, सन्मानाला आणि संवेदनशील सेवेला प्राधान्य देण्याचा रुग्णालयाचा प्रयत्न आहे.
या यशस्वी शस्त्रक्रियेबद्दल लॉयड्स मेटल्स अँड एनर्जी लिमिटेडचे प्रबंध संचालक बी. प्रभाकरन यांनी डॉक्टर, परिचारिका आणि संपूर्ण वैद्यकीय कर्मचाऱ्यांचे अभिनंदन केले. तसेच माता आणि नवजात बालकाच्या उत्तम आरोग्यासाठी शुभेच्छा व्यक्त केल्या.
गडचिरोलीसारख्या दुर्गम जिल्ह्यात वेळेवर आणि आधुनिक उपचार मिळाल्यास माता व बालकांचे आरोग्य सुरक्षित ठेवणे शक्य आहे, याचा विश्वास या यशस्वी प्रसूतीने अधिक दृढ केला आहे.
