VAINGANGA NEWS 24/ विशेष प्रतिनिधी
आमदार डॉक्टर देवरावजी होळी यांना उमेदवारांचे निवेदन.
गडचिरोली पोलीस दलाच्या भरती प्रक्रियेत खुला प्रवर्ग व आर्थिक दृष्ट्या मागासलेल्या विद्यार्थ्यांसाठी २०१९ पासुनच्या भरतीत एकही जागा नाही.
“उमेदवारांमध्ये प्रचंड असंतोष”
तातडीने नवीन जागा आरक्षित करून भरती प्रक्रिया राबवण्याची केली मागणी.
गडचिरोली,०४ मार्च २०२४::- गडचिरोली पोलीस दलाच्या मार्फत २०२३-२४ करिता ७४२ जागांसाठी पोलिस भरती प्रकिया राबविण्यात येत असून यात ई डब्ल्यू एस व खुल्या प्रवर्गातील उमेदवारांसाठी एकही जागा नसल्याने त्यांना शासनाने दिलेल्या आरक्षणाप्रमाणे जागा उपलब्ध करून देऊन भरती प्रक्रिया राबवावी अशी मागणी गडचिरोली विधानसभा क्षेत्राचे आमदार डॉक्टर देवरावजी होळी यांनी उमेदवारांकडून निवेदन स्वीकारताना केली आहे.
पोलीस दलामार्फत २०२३-२४ च्या या भरती प्रक्रियेत अनुसूचित जाती १२१ ,अनुसूचित जमाती २१०, वि ज अ- ५४, भटक्या जमाती अ ५०, भटक्या जमाती- क ५७, भटक्या जमाती -ड ४६, विमाप्र-४६, इमाव १५८ अशाप्रकारे एकूण ७४२ जागा आरक्षित केल्या असून त्यामध्ये आर्थिक दृष्ट्या दुर्बल घटकांसाठी एकही जागा नाही , तसेच खुल्या प्रवर्गातील विद्यार्थी उमेदवारांसाठी ही एकही जागा नाही. त्यामुळे पोलिस भरतीची तयारी करण्याऱ्या विद्यार्थ्यांमध्ये व भरती प्रक्रियेमध्ये सहभागी होण्यासाठी इच्छुक उमेदवारांमध्ये प्रचंड नाराजी पसरलेली असून आपला असंतोष त्यांनी निवेदनाच्या माध्यमातून आमदार डॉक्टर देवरावजी होळी यांच्याकडे व्यक्त केला आहे.
गडचिरोली पोलीस दलाच्या २०१९ पासुनच्या भरती प्रक्रियेत खुला प्रवर्ग व आर्थिक दृष्ट्या दुर्बल घटकांसाठी एकही जागा भरल्या गेली नाही सरकारने या घटकाला १० टक्के आरक्षण दिलेले असूनही एकही जागा दिली जात नसल्याने आम्हाला न्याय मिळवून द्यावा अशी मागणी निवेदनाच्या माध्यमातुन केली आहे.
आमदार डॉक्टर देवरावजी होळी यांनी यासंदर्भात राज्य शासनाकडे तातडीने पाठपुरावा करून आर्थिक दृष्ट्या दुर्बल घटकांतील या उमेदवारांसाठी व खुल्या प्रवर्गातील उमेदवारांसाठी जागा निश्चितच उपलब्ध करून दिल्या जातील असे आश्वासन निवेदकाना दिले.
