VAINGANGA NEWS 24/विशेष प्रतिनिधी,
गडचिरोली /चामोर्शी,१८ ऑगस्ट२०२६::- ‘विदर्भाची काशी’ म्हणून प्रसिद्ध असलेल्या चामोर्शी तालुक्यातील ऐतिहासिक मार्कंडेश्वर देवस्थान परिसरात श्रावण महिन्याच्या पहिल्याच सोमवारी वैनगंगा नदीच्या पवित्र तीरावर प्रथमच ‘महागंगा पूजा-आरती’ चा धार्मिक सोहळा मोठ्या भक्तिमय वातावरणात संपन्न झाला. भाजपा यांच्या वतीने आयोजित करण्यात आलेल्या या उपक्रमाला भाविकांचा उत्स्फूर्त प्रतिसाद लाभला.
मार्कंडेश्वर देवस्थान आणि वैनगंगा नदीच्या पवित्र परिसरात झालेल्या या सोहळ्यात मंत्रोच्चार, धार्मिक विधी आणि गंगा आरतीने वातावरण भक्तिरसाने भारावून गेले. श्रावण महिन्याच्या प्रारंभी वैनगंगा नदीची विधिवत पूजा करून नदीचे पावित्र्य, स्वच्छता आणि संवर्धनाचा संदेश या उपक्रमातून देण्यात आला.
या धार्मिक सोहळ्याला गुरुवर्य कथावाचक पंडित विनोद बिहारी गोस्वामी महाराज, भाजपा विदर्भ संघटन मंत्री डॉ. उपेंद्र कोठेकर, मुख्यमंत्री देवेंद्र फडणवीस यांचे ओएसडी सुमित मित्रा, श्रीवास्तव, भाजपा आदिवासी मोर्चा प्रदेशाध्यक्ष तथा माजी आमदार डॉ. देवराव होळी, माजी खासदार अशोक नेते, भाजपा जिल्हाध्यक्ष प्रा. रमेश बारसागडे, गडचिरोली नगराध्यक्ष अॅड. प्रणोती निंबोळकर, बिनाराणी होळी, शितल सोमणांनी यांच्यासह भाजपा पदाधिकारी, कार्यकर्ते आणि भाविक मोठ्या संख्येने उपस्थित होते.
यावेळी मान्यवरांनी मार्कंडेश्वर देवस्थानचे धार्मिक, ऐतिहासिक व सांस्कृतिक महत्त्व अधोरेखित केले. तसेच वैनगंगा नदी ही परिसराच्या जीवनाचा महत्त्वाचा आधार असून तिचे प्रदूषण रोखणे, स्वच्छता राखणे आणि संवर्धन करणे ही सामूहिक जबाबदारी असल्याचे सांगत नागरिकांनी नदी संवर्धनाच्या कार्यात सक्रिय सहभाग घ्यावा, असे आवाहन केले.
श्रावणाच्या पहिल्याच सोमवारी झालेल्या या **‘महागंगा पूजा-आरती’**मुळे मार्कंडेश्वर देवस्थान परिसरात दिवसभर धार्मिक उत्साह आणि भक्तिमय वातावरण अनुभवायला मिळाले. या उपक्रमातून धार्मिक श्रद्धेसोबतच नदी संवर्धनाचा सामाजिक संदेशही प्रभावीपणे जनमानसापर्यंत पोहोचला.
